பிசாசு: A Modern Fairytale

pisasu-tamil-pictures-057

பொதுவாக தமிழ்த் திரையுலகில் திகில் திரைப்படங்களின் இடம் மிகவும் குறைவாகவே இருந்து வருகின்றது. பழைய கறுப்பு – வெள்ளை காலகட்டம், 80களின் தமிழ் படங்கள், சமகாலம் என்று ஒட்டுமொத்த தமிழ் சினிமாவின் வரலாற்றை எடுத்துக் கொண்டாலும் பேய்ப்படங்களின் எண்ணிக்கை வெகுசொற்பமே. இவற்றில் ஒரு படத்தையேனும் க்ளாசிக் வரிசையில் சேர்க்க முடியாது என்பதும் உண்மை. The Exorcist, Evil Dead, Innocents, the Devil’s Backbone, the Ring… போல க்ளாசிக் வரிசையில் இணையும் பேய்ப்படங்கள் தமிழில் வரவில்லை என்பதே நிதர்சனம்.

ஆரம்பகாலங்களில் நான் பார்த்த தமிழ் பேய்ப்படங்களை இப்பொழுது பார்த்தால் சிரிப்பு வரும். அந்நாட்களில் அவை எனக்குள் ஏற்படுத்திய பயம் இப்பொழுது வருவதில்லை. ஆனால், உலக க்ளாசிக் பேய்ப்படங்களை இப்பொழுது பார்த்தாலும் அதன் தன்மை மாறுவதில்லை. பயத்தை ஏற்படுத்தாவிட்டாலும் அதன் அனுபவத்தில் இருந்து மாறுவதில்லை. நான் மேலே சொன்ன திரைப்படங்கள் இந்த வகையில் அடங்கும். உலக சினிமாவிலும் சிரிப்பு மூட்டும் பேய்ப்படங்கள் இல்லாமல் இல்லை. ஆனால், தரமான, ஏனைய சினிமாக்களுக்கு எந்தளவிலும் குறைவில்லாத பேய்ப்படங்கள் அங்கிருந்து வருகின்றன. தமிழ்ச் சூழலுக்கு நடந்தது என்ன?

தமிழில் பேய்ப்படங்களுக்கு ஏதுவான சூழலே காணப்படுகின்றது. இருந்தும் வருடத்துக்கு ஒன்றிரண்டு என்றுதான் வருகின்றது. அதுவும் ஆங்கில, கொரிய படங்களின் காப்பியாகவோ, தழுவலாகவே இருக்கின்றது. சமகாலத்தில் வெளிவந்த தமிழ்ப் பேய்ப்படங்கள் அனைத்தும் இப்படி ஏதோ ஒரு வகையில் இறக்குமதி பேய்கள்தான். இந்த இறக்குமதி பேய்களிடம் ஒரு பிரச்சினை இருக்கின்றது. அதுதான் அவற்றுக்கு குடிபுகுவதற்கு நவீன வீடுகள், ப்ளாட்கள் தேவை. கிராமப் புற பாலடைந்த வீடுகள், பங்களாக்களை அவை விரும்புவதில்லை. இதனால் இந்த படங்கள் ஒரு அந்நியத்தன்மையை நமக்குள் ஏற்படுத்தி விடுகின்றது. இதன் காரணமாகவே அந்த படங்களுடன் எம்மால் ஒட்ட முடிவதில்லை.

பேய்ப்படங்களை மூன்று விதமாக பிரிக்கலாம். ஒன்று பார்வையாளர்களை ரிஸ்க் இல்லாமல் பயமுறுத்த வேண்டும் என்ற நோக்கில் எடுக்கப்படுபவை. இவற்றில் அதிக இடங்களில் திடுக் காட்சிகள் இருக்கும். இசை, ஒளிப்பதிவு, நடிப்பு எல்லாமே பயம், பயம், பயம் என்றே இருக்கும். இந்த வகைக்கு உதாரணங்கள் the Ring, Grudge, Evil Dead இரண்டாவது நகைச்சுவை பேய்ப்படங்கள் (இதில் Spoof, Comedy, Satire எல்லாம் அடங்கும்) இப்படங்களில் திகிலுணர்வுடன், சிரிப்பூட்டும் காட்சிகளும் அதிகம் இருக்கும். Casper, Haunted Mansion, Scary Movie போன்ற படங்களை இதற்கு உதாரணமாகக் கொள்ளலாம். மூன்றாவது வகை சீரியஸ் ரகம். The Devil’s Backbone, Innocents, the Others, the Orphanage போன்ற படங்களை பார்த்திருந்தால் இந்த வகையைப் பற்றிய தெளிவு கிடைக்கும். இத்திரைப்படங்களில் பயம் ஒரு அம்சமாகவே இருக்கும். அதுவே பிரதானமாக அமையாது. அழகியல் தன்மையோடு இத்திரைப்படங்கள் எடுக்கப்பட்டிருக்கும். உதாரணமாக the Devil’s Backbone திரைப்படம் அநீதியாக கொல்லப்பட்ட ஒரு சிறுவனின் ஆவி, அவனைக் கொன்றவனை பழிவாங்கும் கதை. அத்திரைப்படத்தை இயக்குனர் கியர்மோ டெல் டோரோ ஸ்பானிய சிவில் யுத்தப் பின்னணியில், விடலைப் பருவச் சிறுவர்களின் பார்வையில், மிகுந்த அழகியல் நேர்த்தியோடு சொல்லியிருப்பார். உலக சினிமாவில் எந்தவொரு திரைப்படத்திற்கும் சளைக்காத ஒரு அற்புதமான திகில் திரைக்காவியம் அது.

மிஷ்கினின் பிசாசு இந்த மூன்றாவது வகைக்குள் அடங்கும். ஒரு விபத்து. ஒரு மரணம். அதனைச் சூழ நிகழும் அமானுஷ்யங்கள். பிசாசு, அன்பினால் எழுதப்பட்ட ஒரு திகில் சினிமா.

பிசாசு ஒரு பேய்ப்படமாக இருந்தாலும் அதன் கதைசொல்லல் உத்தி ஒரு தேவதைக் கதைப் பாணியில் அமைந்திருக்கின்றது. பழம் மரபு தேவதைக் கதைகளை சினிமா வடிவத்தில் வழங்குபவர்களில் டிம் பர்டன், கியர்மோ டெல் டோரோ போன்றவர்கள் முக்கியமானவர்கள். பிசாசு திரைப்படத்தை பார்த்து முடிக்கும் போது The Devil’s Backbone, Cronos போன்ற திரைப்படங்கள் என்னுள் வந்து போயிற்று. அந்தளவுக்கு இல்லையென்றாலும் பிசாசு ஏற்படுத்திய பாதிப்பு ஆழமானது.

பிசாசு படத்தில் வரும் பேய் வழக்கமான தமிழ் சினிமா கண்டு வந்த பேய்களுக்கு மாற்றமானது. இரத்த வெறியுடன் ஆட்களை கொல்லும் பேய்கள், பழிவாங்கும் பேய்கள் என்பனவே இதுவரைக் காலமும் தமிழ் படங்களில் தலைக்காட்டியிருக்கின்றன. ஆனால், உலக அரங்கில் இதுவொன்றும் புதியதல்ல. El Orfenato படம் திகிலுடன் தாயன்பை பேசியிருக்கும். The Others இதில் இன்னொரு பரிமாணம்.

ஜப்பானிய நாட்டார் மரபு பேய், பிசாசுக் கதைகளால் நிரம்பியது. அதில் இரத்தவெறிகொண்ட பேய்கள் இருப்பது போலவே, அன்பான, ஆபத்தில் இருப்பவர்களுக்கு உதவக் கூடிய பேய்களும் உண்டு. ஆற்றில் மூழ்குபவர்களை காப்பாற்றுவதற்கு ஆற்று மோகினிகள் இருப்பதாக அங்கு நம்பிக்கைகள் உண்டு. ருஷ்ய நாட்டார் மரபில் வரும் பாபா – யாகா எனும் சூனியக்காரியின் கதை அங்கு பிள்ளைகளை பிடித்துக் கொண்டு போகும் கெட்ட பேயாகவும், ஆபத்தில் இருக்கும் பிள்ளைகளை காப்பாற்றும் பேயாகவும் சித்தரிக்கப்படுகின்றது.

பிசாசு திரைப்படத்தில் வரும் பேயும் அவ்வாறானதொன்றே. மிஷ்கின் இந்த பேயை அன்பின் உருவமாக சித்தரித்திருக்கின்றார். பெருநகரங்களின் சக்கரங்களில் சிக்குண்டு வாழும் மனிதர்களின் உலகை மிஷ்கினின் கேமரா அதிகம் துரத்தும். அது அவர்கள் மீது பரிவு, பச்சாதாபத்தை உண்டு பண்ணும் தமிழ் சினிமாத்தனமான உருத்தும் காட்சிகளாக இருக்காது. மாறாக மனிதம், அறம், அன்பின் வெளிப்பாடாகவே அது இருக்கும்.

படத்தில் இசையின் பங்கு ஆழமானது. புதிய இசையமைப்பாளர் அரோல் கொரலி இன் வயலின் இசை ஒரு அற்புதம் என்றே சொல்லலாம். படத்தின் உயிர்நாடியாக ஒலிக்கிறது இசை என்று விமர்சனங்களில் படித்திருக்கின்றேன். அதன் உண்மையான அர்த்தத்தை இப்படத்தில் உணர முடிகிறது.

ஆனால் பயமேயில்லாத பேய்ப்படத்திற்கு டீசர், ட்ரைலர், போஸ்டர் எல்லாமே திகிலூட்டுவதாகவே அமைந்திருந்தது ஏன் என்றுதான் புரியவில்லை. படத்தைப் பற்றி வந்த நெகடீவ் விமர்சனங்கள் பல பயமேயில்லாத பேய்ப்படம் என்று சொல்கின்றார்கள். அதற்கு பிரதான காரணம் படத்திற்கான ப்ரோமோஷன்கள்தான்.

படத்தின் பிரதான பாத்திரம் சித்தார்த் (நாகா), முதல் அமானுஷ்ய காட்சியிலேயே அரண்டு போவது பொருந்தவில்லை. இப்பாத்திரத்தின் நடிப்பு இம்மாதிரியான காட்சிகளில் சரியாக ஈடுகொடுக்கவில்லை.

இருந்தாலும் குறைகள் கடந்து பிசாசு ஒரு தேவதை.

Advertisements

3 comments

  1. //படத்தில் இசையின் பங்கு ஆழமானது. புதிய இசையமைப்பாளர் அரோல் கொரலி இன் வயலின் இசை ஒரு அற்புதம் என்றே சொல்லலாம்// முற்றிலும் உண்மை. //பிசாசு, அன்பினால் எழுதப்பட்ட ஒரு திகில் சினிமா.// இந்தக் கருத்தில் எனக்கு உடன்பட முடியவில்லை. பிறகு காதலை வேறு உள்ளே புகுத்தியிருப்பது கதையின் பலவீனம் என்றே கருதுகிறேன். இன்னும் திரைக்கதையில் பலவீனங்கள் உண்டு, விவாதிக்கலாம்

    • இடையில் காதலை புகுத்தியிருப்பதில் எனக்கும் உடன்பாடில்லைதான். கடைசியாக கட்டுரையில் குறிப்பிட்டுள்ளது போன்று நாகாவின் நடிப்பும், திரைக்கதையில் முட்டிக்கொண்டுதான் இருக்கின்றது. ஆனால், மொத்தமாக பார்க்கும் போது எனக்கு கிடைத்த அனுபவத்தையே பதிந்திருக்கின்றேன்.

  2. இன்னும் பார்க்கவில்லை… மும்பையில் திரையரங்கில் வரவேயில்லை… லேப்டாப்’இல் பார்க்க மனமில்லை… சசி (என் மனைவி) பார்த்துவிட்டு பிடித்திருப்பதாக சொன்னாள்…

    பிகு: ‘டார்லிங்’ பார்த்து விட்டேன்…

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s